Maradonanı həkimlər öldürüb? - Sirr pərdəsi qalxır

Əfsanəvi argentinalı futbolçu Diego Maradonanın ölümü ilə bağlı aparılan istintaq çərçivəsində yeni detallar üzə çıxıb. Argentinada davam edən məhkəmə prosesində ifadə verən həkimlər Maradonanın ölümündən əvvəl yüksək təzyiq dərmanlarını qəbul etməyi dayandırdığını bildirib.

AJMEDIA.NEWS xarici mediaya istinadla xəbər verir ki, Buenos Ayres yaxınlığındakı San İsidro Cinayət Məhkəməsində keçirilən iclasda futbolçunun son sağlamlıq vəziyyəti müzakirə olunub. Həkimlərin sözlərinə görə, Maradona ciddi ürək problemlərindən əziyyət çəkirdi və təzyiq dərmanlarını dayandırması onun durumunu daha da ağırlaşdırıb.

Kardioloq Oskar Franso ifadəsində bildirib ki, Maradona 2020-ci ilin sentyabrında “Losartan” adlı təzyiq dərmanı istifadə edirdi. Daha sonra isə bu preparatın dayandırılması ürək çatışmazlığı riskini artırıb. Digər həkim Markos Korrea isə noyabr ayında apardığı müayinədə futbolçunun bir neçə psixiatrik dərman qəbul etdiyini, lakin onların arasında təzyiq dərmanına rast gəlmədiyini deyib.

Prokurorluq isə Maradonaya vaxtında tibbi yardım göstərilmədiyini iddia edir. İstintaqa görə, futbolçunun ev şəraitində müalicəsi kifayət qədər peşəkar təşkil olunmayıb və bu səbəbdən onun ölümünün qarşısını almaq mümkün olmayıb.

Hazırda Maradonanın şəxsi həkimi Leopoldo Luque, psixiatr Agustina Cosachov və daha bir neçə tibb işçisi daxil olmaqla 7 nəfər məhkəmə qarşısındadır. Təqsirləri sübuta yetirilərsə, onları uzunmüddətli həbs cəzası gözləyir.

Qeyd edək ki, Diego Maradona 25 noyabr 2020-ci ildə 60 yaşında vəfat edib. Rəsmi məlumata görə, ölüm səbəbi xroniki ürək çatışmazlığı fonunda yaranan ağciyər ödemi olub.