İstanbulda Azərbaycan Respublikasının 108-ci İldönümü Təntənə ilə Qeyd Olunub

Türkiyə Azərbaycan Dostluq Federasiyasının başqanı Səfərbəy Qaraqoyunlu təşkilatçılığı ilə İstanbul şəhərində Azərbaycan Respublikasının 108-ci ildönümünə həsr olunmuş möhtəşəm tədbir keçirilib. Tədbir Azərbaycan və Türkiyə arasında qardaşlıq münasibətlərinin, ortaq tarix və mənəvi bağların bir daha nümayiş olunduğu önəmli platformaya çevrilib.

Gecədə Türkiyə Cümhuriyyətinin tanınmış ictimai-siyasi xadimləri, millət vəkilləri, bələdiyyə başqanları, elm və mədəniyyət nümayəndələri, media təmsilçiləri və çoxsaylı qonaqlar iştirak ediblər. Tədbirdə iki qardaş ölkənin dövlət himnləri səsləndirilib, Azərbaycan-Türkiyə dostluğunu əks etdirən videoçarxlar nümayiş olunub.

Tədbirdə çıxış edən Elçin Axundzadə Azərbaycan-Türkiyə münasibətlərinin region üçün strateji əhəmiyyətindən danışaraq bildirib ki, iki dövlət arasında dostluq təkcə siyasi müttəfiqlik deyil, həm də ortaq milli və mənəvi dəyərlərin vəhdətidir. O, çıxışında Azərbaycanın müstəqillik tarixindən, dövlətçilik ənənələrindən və Türk dünyasının birliyinin vacibliyindən bəhs edib.

Elçin Axundzadənin çıxışı tədbir iştirakçıları tərəfindən gurultulu alqışlarla qarşılanıb. Onun Türk dünyasının həmrəyliyi və gələcək əməkdaşlıq perspektivləri ilə bağlı fikirləri xüsusi maraq doğurub. Tədbirin sonunda ona Türkiyə Azərbaycan Dostluq Federasiyası adından xüsusi ödül təqdim edilib.

Gecənin aparıcısı olan azərbaycanlı Nuray Əliqızı tədbiri yüksək peşəkarlıqla idarə edərək iştirakçılara xüsusi atmosfer yaşadıb. Tədbir boyu Azərbaycan və Türkiyə musiqiləri səsləndirilib, dostluq və birlik mesajları verilib.

Qeyd edək ki, bu cür tədbirlər Azərbaycan-Türkiyə münasibətlərinin daha da möhkəmlənməsinə, xalqlar arasında mədəni və ictimai əlaqələrin inkişafına mühüm töhfə verir. “Bir millət, iki dövlət” prinsipi üzərində qurulan münasibətlər bu gün də Türk dünyasının ən güclü qardaşlıq nümunələrindən biri kimi qiymətləndirilir.

ajmedia.news