İsrail XİN-dən İran və Türkiyə ilə bağlı açıqlama...

İsrailin İran və Türkiyə ilə bağlı son açıqlamaları regionda gərginliyi artırıb. Bu bəyanatlar vəziyyəti daha həssas mərhələyə gətirib.

AJMEDİA.NEWS xəbər verir ki, İsrailin xarici işlər naziri Gideon Saar İran hakimiyyətinin ölkədəki kütləvi etirazlara görə İsraili günahlandırmasını “absurd” adlandırıb.

Saar bildirib ki, İran İsraildən təxminən 1500 kilometr uzaqdadır və milyonlarla insanın küçələrə çıxmasını nə İsrailin, nə də ABŞ-ın təsiri ilə izah etmək mümkün deyil. Onun sözlərinə görə, İran rejimi illərdir öz xalqına qarşı zorakılıq göstərir, minlərlə insanın ölümünə səbəb olur və indi daxili böhranı ört-basdır etmək üçün məsuliyyəti xarici qüvvələrin üzərinə atmağa çalışır.

Nazir vurğulayıb ki, İsrailin problemi İran xalqı ilə yox, rejimlədir. O bildirib ki, bu rejim HAMAS, “Hizbullah” və husilər kimi terror təşkilatlarını maliyyələşdirir və onları İsrailə qarşı istifadə edir.

Gideon Saar Türkiyə ilə münasibətlərə də toxunub. O deyib ki, Yerusəlimin Ankara ilə əlaqələri daha da pisləşdirmək kimi niyyəti yoxdur.

Nazir qeyd edib ki, münasibətlər mövcuddur, sadəcə son vaxtlar gərginləşib və bu, Türkiyənin seçimi olub. Buna baxmayaraq, İsrail vəziyyəti daha da ağırlaşdırmaq istəmir.