İsrail-Türkiyə xəttində gərginlik artır: Müdafiə nazirindən açıq mesaj

İsrailin müdafiə naziri Yisrael Katz Suriyanın cənubunda İsrail ordusunun nəzarətində olan əraziyə səfəri zamanı bölgədə gərginliyi daha da artıran açıqlamalar verib. Katz Suriya Prezidenti Əhməd Şaranı hədəf alaraq İsrailin nəzarət etdiyi ərazilərdən geri çəkilməyəcəyini bildirib. İsrailli nazir Türkiyənin Suriyadakı fəaliyyətlərini də ölkəsinin milli təhlükəsizliyi üçün təhdid kimi qiymətləndirib.

AJMEDİA xəbər verir ki, Katz İsrailin təhlükəsizlik narahatlıqları davam etdiyi müddətdə Hermon dağı və digər nəzarət altında saxlanılan ərazilərdən geri çəkilməyəcəyini deyib. İsrail müdafiə naziri Suriya Prezidenti Əhməd Şaraya müraciət edərək açıq şəkildə meydan oxuyub. Katz bildirib ki, Şara Dəməşqdəki sarayında səhər oyandıqda Hermon dağına baxarkən İsrail ordusunu görə bilər. Onun sözlərinə görə, İsrail hərbçiləri sərhədləri qorumaq məqsədilə həmin ərazilərdə qalacaqlar.
İsrailli nazir bu mövqenin təhlükəsizlik narahatlıqları aradan qalxana qədər dəyişməyəcəyini vurğulayıb.

Katzın açıqlamalarında Türkiyə ilə bağlı fikirlər də diqqət çəkib. İsrailli nazir Türkiyənin Suriya ərazisindəki fəaliyyətlərinin İsrailin milli təhlükəsizlik maraqlarını riskə atdığını iddia edib. Katz Türkiyənin bölgədəki addımlarına laqeyd qalmayacaqlarını və hazırkı hərbi mövqelərini qoruyacaqlarını bildirib. Beləliklə, İsrail rəsmisinin açıqlamaları həm Dəməşq rəhbərliyi, həm də Ankara ilə bağlı gərgin ritorikanın davam etdiyini göstərib.

Katzın açıqlamaları İsrailin Suriyaya son hərbi zərbələrindən qısa müddət sonra səslənməsi ilə də diqqət çəkib. İsrail hərbi təyyarələri avqustun 18-də Suriyanın İdlib vilayətində yerləşən Ebu Zühur hərbi hava bazasına hava zərbələri endirib. Suriya Xarici İşlər Nazirliyi hücumu pisləyərək bunu bölgənin təhlükəsizliyinə təhdid yaradan təhlükəli eskalasiya kimi qiymətləndirib.

BMT-nin Suriya üzrə xüsusi nümayəndəsinin müavini Klaudio Kordone də hücuma münasibət bildirərək İsraili Suriyanın ərazi bütövlüyünə hörmət etməyə çağırıb.
İsrailin Suriyadakı hərbi mövqelərini qorumaqda israr etməsi və Türkiyənin bölgədəki fəaliyyətlərini təhlükə kimi təqdim etməsi isə regionda onsuz da yüksək olan gərginliyin daha da artması ilə bağlı narahatlıqları gücləndirib.//referans