İsrail İraqda gizli hərbi baza yaradıb - KİV

İsrailin İrana qarşı hərbi əməliyyata başlamazdan əvvəl İraq ərazisində gizli hərbi baza yerləşdirdiyi iddia olunur.

AJMEDİA.NEWS xəbər verir ki, bu barədə "The Wall Street Journal" mənbələrə istinadən məlumat yayıb.

Məlumata görə, obyekt İsrail Hərbi Hava Qüvvələri üçün logistika mərkəzi kimi fəaliyyət göstərib. Bazada, həmçinin xüsusi təyinatlı qüvvələr və İsrail təyyarələrinin vurulacağı halda istifadə olunmaq üçün axtarış-xilasetmə qrupları yerləşdirilib.

Nəşr qeyd edir ki, ABŞ-yə məxsus "F-15" qırıcısı İran səmasında qəzaya uğradıqda İsrail Vaşinqtona yardım təklif edib. ABŞ hərbçiləri hər iki pilotu öz qüvvələri ilə təxliyə etsələr də, "The Wall Street Journal"ın mənbəsinin sözlərinə görə, İsrail həmin vaxt xilasetmə əməliyyatının təhlükəsizliyini təmin etmək üçün hava zərbələri endirib.

Qəzet yazır ki, martın əvvəlində İsrailin bu bazası demək olar ki, ifşa olunacaqdı. Yerli sakinlərdən biri qeyri-adi hərbi aktivliyə diqqət yetirdikdən sonra İraq hərbçiləri əraziyə kəşfiyyat məqsədilə yollanıblar, lakin hücuma məruz qalıblar.

Daha sonra İraq hakimiyyəti yoxlama aparmaq üçün əlavə qüvvələr göndərib və həmin ərazidə hərbi kontingentin mövcudluğunu göstərən izlər aşkarlanıb.

WSJ bildirir ki, ABŞ də hərbi əməliyyatlar ərəfəsində müvəqqəti obyektlər yaradır. Nəşrin məlumatına görə, aprelin əvvəlində amerikalı pilotların təxliyəsi zamanı İranda da belə bir məntəqə qurulub.

Xilasetmə əməliyyatı başa çatdıqdan sonra ABŞ bazanı tərk edə bilməyən təyyarə və helikopterləri məhv edib.