İsrail "Dəmir şüa" HHM lazer sisteminin işlənib hazırlanmasını başa çatdırdı

İsrail lazer texnologiyasından istifadəyə əsaslanan qabaqcıl "Dəmir şüa" hava hücumundan müdafiə sisteminin işlənib hazırlanmasını başa çatdırıb, onun İsrail ordusuna ilk tədarükü 2025-ci ilin dekabr ayına planlaşdırılıb.

AJMEDİA.NEWS-un İsrail Müdafiə Nazirliyinin Mətbuat Xidmətinə istinadən xəbərinə görə, bu barədə Müdafiə Tədqiqatları və İnkişaf İdarəsinin rəhbəri Daniel Qold məlumat verib.

"Gözlənilir ki, "Dəmir şüa" lazer sistemi döyüş meydanında müharibə qaydalarını kökündən dəyişəcək. İşlənib hazırlanması və onun imkanlarını təsdiqləyən hərtərəfli sınaq proqramı başa çatdıqdan sonra, biz onun İsrail Müdafiə Qüvvələrinə ilk tədarükünü 30 dekabr 2025-ci ildə reallaşdırmağa hazırıq", - deyə Qold bildirib.

O əlavə edib ki, İsrail eyni vaxtda artıq yeni nəsil sistemlər üzərində işləyir.

"Müdafiə Nazirliyinin strategiyasına uyğun olaraq, biz kosmik, hücum və müdafiə sahələrində gələcək münaqişələr üçün növbəti nəsil texnoloji "sürprizlər"i fəal şəkildə inkişaf etdiririk və uyğun vaxtda onları istismara verəcəyik", - deyə Qold əlavə edib.

"Dəmir şüa" sistemi (həmçinin "İşıq qalxanı" kimi də tanınır) lazer şüasından istifadə edərək qısamənzilli raketlərin, eləcə də minaatan və artilleriya mərmilərinin qarşısının alınması üçün nəzərdə tutulub. Həmçinin onun kiçikölçülü PUA-ları (pilotsuz uçuş aparatı) da məhv etmək qabiliyyətinə malik olduğu ehtimal edilir.

Qeyd edək ki, İsrailin raketdən müdafiə sisteminin modernləşdirilməsi planları barədə ilk dəfə 2022-ci ildə ovaxtkı baş nazir postunu tutan Naftali Bennett məlumat verib. Artıq 2022-ci ilin aprel ayında İsrail "Dəmir şüa"nın ilk uğurlu sınaqlarını elan edib və bu sınaqlar zamanı sistem minaatan və tank əleyhinə mərmilərin, eləcə də raketlərin qarşısını ala bilib.