İrqçilik və Dözümsüzlüyə Qarşı Avropa Komissiyası Azərbaycanı tənqid etdi

Avropa İrqçilik və Dözümsüzlüyə Qarşı Komissiyası (ECRI) 2023-cü ildə Azərbaycanla bağlı hesabatında hakimiyyət orqanlarına verilən əsas tövsiyənin Ombudsmanın səlahiyyətlərini, müstəqilliyini və effektivliyini ECRI standartlarına tam uyğunlaşdırmaq olduğunu bildirib.

Ombudsmanın hazırda parlament tərəfindən seçilməsi düzgün istiqamətdə atılan addım olsa da, ECRI hesab edir ki, qanunla təsbit olunmuş mövcud prosedur şəffaflıqdan məhrumdur və icra hakimiyyəti hələ də seçim prosesinə, xüsusən də Azərbaycan Prezidenti tərəfindən namizədlərin irəli sürülməsi və ya əvvəlcədən seçilməsi zamanı həlledici təsir göstərə bilər.

ECRI Ombudsman institutunun gücləndirilməsi üçün bəzi tədbirlərin görüldüyünü etiraf edir, lakin tövsiyəsinin qismən yerinə yetirildiyi qənaətinə gəlir.

İkinci prioritet tövsiyə irqçi və LGBT-fobik nifrət nitqi və nifrət cinayətləri ilə bağlı hərtərəfli məlumat toplama sisteminin yaradılması və bu məlumatların ictimaiyyət üçün əlçatan olması idi.

ECRI təəssüflə bildirir ki, nifrət nitqi və nifrət cinayətləri haqqında cinayət kateqoriyası, nifrət motivi növü, hədəf qrupu, təqib və nəticə üzrə tam şəkildə ayrı-ayrı məlumatların toplanması və ya bu cür məlumatların ictimaiyyətə açıqlanması üçün heç bir addım atılmayıb. Komissiya bu tövsiyənin yerinə yetirilmədiyi qənaətinə gəlir.