İrana milyardlarla dollarlıq şok zərbə: Qətər Tehrana...

İran parlamentinin spikeri Məhəmməd Baqir Qalibafın rəhbərlik etdiyi yüksək rütbəli rəsmi nümayəndə heyətinin Qətərin paytaxtı Dohaya səfəri Tehran üçün böyük diplomatik uğursuzluq və rüsvayçılıqla başa çatıb.

AJMEDIA xəbər verir ki, bu barədə "Iran International" telekanalı danışıqların pərdəarxası detallarına bələd olan etibarlı mənbələrə istinadən məlumat yayıb.

Sızan məlumatlara görə, rəsmi Tehran ABŞ ilə imzalanmış ilkin memorandumun ardınca Qətərdə dondurulmuş 12 milyard dollar nəqd vəsaitin təcili və qeyd-şərtsiz sərbəst buraxılmasını tələb edib.

Lakin Qətər tərəfi İranın bu tələbini qəti şəkildə rədd edərək milyardlarla dolları təhvil verməkdən boyun qaçırıb. Mənbələr bildirir ki, Doha rəsmi Tehrana həmin nəhəng məbləğin yalnız çox kiçik bir hissəsini, o da olduqca məhdud və sərt şərtlər daxilində verməyə razılaşıb.

Nəticədə İran rəhbərliyi gözlədiyi maliyyə resurslarına birbaşa çıxış əldə edə bilməyib və tamamilə əliboş qalıb. Mənbə yazır ki, Vaşinqtonla gələcək dialoqu daha da çətinləşdirməmək və yaranmış rüsvayçı vəziyyəti ört-basdır etmək üçün tərəflər bu uğursuz danışıqların detallarını mətbuata sızdırmamaq barədə öz aralarında gizli razılığa gəliblər.//musavat.com