İran bu ölkələrin ordularını "terrorçu" elan edəcək

İranın Ali Milli Təhlükəsizlik Şurasının baş katibi Əli Laricani, İnqilab Keşikçiləri Korpusunu “terror təşkilatı” elan edən Avropa İttifaqı (Aİ) ölkələrinin ordularının “terrorçu” hesab ediləcəyini və bu vəziyyətin nəticələrinə görə Aİ liderlərinin məsuliyyət daşıyacağını bildirib.

AJMEDİA.NEWS Türkiyə mətbuatına istinadla xəbər verir ki, İranın Ali Milli Təhlükəsizlik Şurasının baş katibi Əli Laricani sosial media hesabında paylaşdığı mesajda Aİ-nin İranın konstitusion hərbi qurumu olan İnqilab Keşikçiləri Korpusunu “terror təşkilatı” elan etməsi qərarını dəyərləndirib.

Laricani paylaşımında qeyd edib: “Avropa İttifaqı yaxşı bilir ki, İran parlamentinin qərarına əsasən, İnqilab Keşikçiləri Korpusuna qarşı Aİ-nin son qərarında adı çəkilən ölkələrin orduları terrorçu kimi qəbul ediləcək. Buna görə də, belə bir addımın nəticələrinə görə məsuliyyət bu cür hərəkətə yol verən Avropa ölkələrinin üzərinə düşür.”

Qeyd edək ki, İran parlamenti 2023-cü ildə Aİ-nin İnqilab Keşikçiləri Korpusunu “terror” siyahısına salması halında Avropa ordularının “terrorçu” kimi tanınmasını nəzərdə tutan qanun qəbul etmişdi.

İran 2019-cu ildə də ABŞ-ın İnqilab Keşikçiləri Korpusunu “xarici terror təşkilatı” elan etməsindən sonra ABŞ ordusunu “terror təşkilatı” kimi tanımışdı.