Həddindən artıq maye qəbulu orqanizmdə ciddi fəsadlara səbəb olur - XƏBƏRDARLIQ!

Su içmək sağlam həyat üçün vacib hesab olunur, lakin normadan artıq maye qəbulu bəzən ciddi sağlamlıq problemlərinə səbəb ola bilər.

AJMEDİA.NEWS xəbər verir ki, su orqanizmdə toksinlərin xaric edilməsində, susuzluğun qarşısının alınmasında və daxili orqanların düzgün işləməsində mühüm rol oynayır. Bununla yanaşı, həddindən artıq su qəbulu bədəndə tarazlığın pozulmasına gətirib çıxara bilər.

Həkim Tamara İlyinskaya su intoksikasiyası, yəni hiponatremiya barədə xəbərdarlıq edib.

Həkimin sözlərinə görə, bu vəziyyətdə qanda natriumun səviyyəsi kəskin şəkildə azalır. Nəticədə insanlarda baş ağrısı, ürəkbulanma kimi yüngül əlamətlərdən başlayaraq, qıcolma və hətta koma kimi ağır hallara qədər müxtəlif simptomlar yarana bilər.

O qeyd edir ki, böyrəklər saatda təxminən bir litr maye emal edə bilir. Bu hədddən artıq su içildikdə orqanizm yüklənir və elektrolit balansı pozulur. Qısa müddətdə 3–4 litr su qəbul edilməsi hiponatremiya riskini artıra bilər və bu, beyin fəaliyyətinə mənfi təsir göstərə bilər.

Gündəlik su ehtiyacı isə insanın fiziki aktivliyi, çəkisi və yaşadığı mühitdən asılı olaraq dəyişir. Həkim xüsusilə hamilə qadınların, idmançıların və yaşlı insanların susuzluq hissini gözləmədən maye qəbul etməsinin vacibliyini vurğulayır.

İsti havalarda isə təkcə adi su ilə kifayətlənməmək, mineral su və ya lazım gəldikdə az miqdarda elektrolit balansını qoruyan içkilərdən istifadə etmək tövsiyə olunur.