Gürcüstanın Aİ-yə üzvlük prosesi dayandırıldı

Gürcüstan hökuməti avtoritar kursunu dəyişməyincə Avropa İttifaqına daxil ola bilməyəcək.

AJMEDİA xəbər verir ki, bu barədə Avropa Parlamentinin (AP) rəsmi “X” hesabında dərc olunan məlumatda bildirilir.

“Avropa Parlamenti gürcü xalqının yanındadır. Parlament Gürcüstanın hazırkı hökumətini tanımır və bəyan edir ki, ədalətli seçkilər keçirilənə qədər onun Aİ-yə üzvlük prosesi faktiki olaraq dayandırılır”, - məlumatda deyilir.

Qeyd edək ki, Avropa Parlamenti iyulun 9-da Gürcüstanla bağlı son qətnaməsini qəbul edib.

Qətnamənin məzmunu, əsasən, “Gürcü arzusu” rejiminin legitimliyinin tanınmamasını davam etdirmək, müxalifət xadimlərinin həbsini pisləmək, sanksiyalar tətbiq etmək, yeni parlament seçkilərinin keçirilməsini tələb etməkdən ibarətdir.

Qətnamə həmçinin Aİ-yə üzv dövlətləri sanksiyalara əlavə olaraq əlavə məhdudlaşdırıcı tədbirləri nəzərdən keçirməyə çağırır.

Avropa Parlamentinin qətnamələri məcburi deyil, tövsiyə xarakterlidir, lakin üzv dövlətlərin siyasi dairələrinin mövqelərini ifadə edir.//Yeniavaz.com