Ermənistanda seçkilərin yekun nəticələri bu tarixdə açıqlanacaq

Ermənistan Mərkəzi Seçki Komissiyası (MSK) parlament seçkilərinin yekun rəsmi nəticələrini iyunun 14-də açıqlayacaq.

AJMEDİA.NEWS xəbər verir ki, bu barədə MSK sədri Vaaqn Ovakimyan məlumat yayıb.

Ovakimyanın sözlərinə görə, iyunun 12-si, cümə gününə qədər komissiya bülletenlərin yenidən sayılması və müvafiq dürüstləşdirmə mərhələlərini həyata keçirəcək. Bu proses bitdikdən sonra isə seçki ilə bağlı daxil olan rəsmi şikayət və ərizələrə baxılacaq.

Artıq müxalifət düşərgəsi seçkinin nəticələrini qəbul etməyəcəyini bəyan edib. Keçmiş prezident Robert Koçaryanın rəhbərlik etdiyi müxalif “Ermənistan” bloku parlament seçkilərinin ilkin nəticələrinə məhkəmədə etiraz edəcəyini və növbəti addımları müəyyənləşdirmək üçün digər müxalif qüvvələrlə təcili məsləhətləşmələrə başladığını açıqlayıb.

Xatırladaq ki, iyunun 7-də Ermənistanda ölkənin yaxın bir neçə illik geosiyasi kursunu müəyyən edəcək növbədənkənar parlament seçkiləri başa çatıb. Deputat mandatları uğrunda 2 blok və 16 siyasi partiya mübarizə aparıb. Seçkinin əsas favoriti Nikol Paşinyanın rəhbərlik etdiyi “Vətəndaş Müqaviləsi” partiyası hesab olunurdu. Onun əsas rəqibi isə respublikanın ən zəngin şəxslərindən biri olan milyarder Samvel Karapetyanın rəhbərlik etdiyi “Güclü Ermənistan” bloku idi.