Ermənistan parlament komitəsi elektrik nəqliyyat vasitələrinin idxalına ƏDV və rüsumların ləğvi məsələsini müzakirə edib: İkinci oxunuşda....

Dekabrın 15-də İrəvanda keçirilən parlamentin iqtisadi məsələlər daimi komitəsinin fövqəladə iclasında elektrik mühərrikli böyük, kiçik və orta ölçülü avtobusların, minik avtomobillərinin, motosikletlərin və mopedlərin idxalı üçün mövcud əlavə dəyər vergisi güzəştinin daha bir il uzadılması məsələsi ikinci və son oxunuşda müzakirə olunub.

AJMEDİA xəbər verir ki, xüsusilə, məsələ Vergi Məcəlləsinə dəyişiklik edən qanun layihəsi ilə bağlıdır. Layihəni Ermənistanın iqtisadiyyat naziri Gevork Papoyan təqdim edib. Nazirin sözlərinə görə, bu siyahıya yük maşınlarının da daxil edilməsi qərara alınıb. Müxalifətdəki Ermənistan blokunun parlament fraksiyası əvvəllər bu təklifi irəli sürüb. "Biz bu təklifi qəbul etmək qərarına gəlmişik", - Papoyan deyib.

Hökumət sözçüsünün sözlərinə görə, 2019-cu ildən qüvvədə olan bu güzəşt 1 yanvar 2026-cı ildə başa çatır. Buna görə də, indiyə qədər əldə edilən müsbət nəticələr nəzərə alınmaqla, hakimiyyət orqanları bu güzəştlərin 31 dekabr 2026-cı ilə qədər uzadılmasını məqsədəuyğun hesab ediblər.