Ərdoğan Avropaya xəbərdarlıq etdi - "Türkiyəsiz heçkimsiniz"

Türkiyə Prezidenti Rəcəb Tayyib Ərdoğan Avropa İttifaqına münasibətdə sərt bəyanatla çıxış edib.

AJMEDIA.NEWS xəbər verir ki, o, Aİ institutlarında Türkiyəyə qarşı “strateji korluğun” hələ də davam etdiyini bildirib.

Ərdoğan vurğulayıb ki, Avropa İttifaqı Türkiyəni tamhüquqlu üzv kimi qəbul etmədən nə qlobal oyunçuya, nə də cazibə mərkəzinə çevrilə bilər.

Türkiyə lideri qeyd edib ki, ölkəsi yalnız ehtiyac yarananda xatırlanan və digər vaxtlarda arxa plana atılan dövlət olmayıb və olmayacaq. Onun sözlərinə görə, Aİ Türkiyənin konstruktiv mövqeyini düzgün qiymətləndirməli və bundan sui-istifadə etməməlidir.

Ərdoğan bildirib ki, artıq nə Türkiyə əvvəlki Türkiyədir, nə də dünya əvvəlki kimidir. Onun sözlərinə görə, yeni dünya formalaşır, regional əməkdaşlıq güclənir və qlobal sistem sürətlə çoxqütblülüyə doğru gedir.

Prezident əlavə edib ki, Türkiyə bu yeni sistemdə əsas güc mərkəzlərindən birinə çevrilməyə hazırdır və Avropanın Türkiyəyə ehtiyacı getdikcə artır.

Ərdoğan sonda Avropa liderlərini siyasi və tarixi stereotiplərdən imtina etməyə və Türkiyə ilə bərabərhüquqlu münasibətlər qurmağa çağırıb.