Əmlakları əlindən alınan Əli Kərimi kimdir - DOSYE

İran hökuməti "Bavariya"nın keçmiş yarımmüdafiəçisi Əli Kəriminin 6 əmlakını müsadirə edib.

AJMEDIA.NEWS bildirir ki, əslən azərbaycanlı olan Əli Kərimi millinin də futbolçusu olub. İran mediasının xəbərinə görə, məhkəmənin qərarı ilə onun iki kommersiya və dörd yaşayış əmlakı müsadirə edilib. Əli Kərimi İran rejiminin əleyhdarıdır. O, İranın "Persepolis", Birləşmiş Ərəb Əmirliyinin "Əl-Əhli", Almaniyanın "Bavariya", Qətərin "Qətər" klublarında oynayıb. Ölkə millisində isə çıxışı əfsanəvi azərbaycanlı futbolçu Əli Daei ilə eyni dövrə təsadüf edib.

O, daha çox öz doğma şəhərinin “Traktor” və “Şəhrdari Təbriz” klublarında çıxış edib. "Asiyalı Maradona" ləqəbli İranın əfsanəvi futbolçusu Əli Kərimi ötən ilin yayında hakim rejimə nifrət dolu çağırış etmişdi. Mətndə bildirmişdi ki, “İranın və iranlıların əsl düşmənləri sizsiniz. Və məhz siz getməli və tarixin qara dəliyində yox olmalısınız”.

Arayış üçün deyək ki, 2004-cü ildə “Asiyanın ən yaxşı futbolçusu” adını alıb. 2009-cu il iyunun 17-də Əli Kərimi İran millisinin heyətində Cənubi Koreya millisinə qarşı son oyununu keçirib. O, 2009-cu ilin prezident seçkisində Mahmud Əhmədinejadın əsas rəqibi Mirhüseyn Musəviyə dəstəyini simvolizə edən yaşıl sarğılarla Cənubi Koreya ilə oyunda meydana daxil olduğu üçün Mehdi Məhdəvikia, Hüseyn Kəəbi və Vahid Haşimianla birlikdə milli komandadan ömürlük kənarlaşdırılıb.

Əli Kərimi İran millisinin heyətində 112 oyuna çıxıb, 36 qol vurub. Ramazan ayında oruc tutmaqdan imtina etdiyinə görə 2010-cu ilin avqustunda İranın “Steel Azin” klubu onu komandadan uzaqlaşdırmışdı. 2010-2011-ci il mövsümündə Almaniyanın "Şalke 04" klubunda çıxış edib. Əli Kərimi 1978-ci il noyabrin 8-də Gilan əyalətinin Siyahkəl rayonunun Paşaki kəndində anadan olub. Gilan əyaləti əvvəllər Güney Azərbaycan ərazisinə aid olub. Tehran rejimi Güney Azərbaycan ərazisini kiçiltmək məqsədi ilə oranı ayırıb.(musavat.com)