Əbülfəs Qarayevin qızı hər kəsdən üzr istədi

“Qısametrajlı filmimlə bağlı son paylaşımım heç vaxt tənqid məqsədi daşımayıb, sadəcə emosional, şəxsi bir düşüncə idi”.

AJMEDİA.NEWS xəbər verir ki, bu sözləri rejissor və ssenari müəllifi Suad Qarayeva qalmaqallı “Məhsəti” filmi ilə bağlı instaqram hesabında etdiyi açıqlamasında bildirib.

O, filmə görə hər kəsdən üzr istəyib: “Azərbaycanın bir vətəndaşı olaraq, ölkəmə, xalqımıza və bizim mədəni dəyərlərimizə hər zaman böyük hörmət və dərin bağlılıqla yanaşmışam. Sözlərimin niyyətimdən fərqli şəkildə başa düşülməsindən səmimi qəlbdən təəssüf edirəm və bundan təsirlənmiş və ya incimiş ola biləcək hər kəsdən üzr istəyirəm.

Dəyərlərimə, ölkəmə, xalqımıza və mədəniyyətimizə olan sarsılmaz bağlılığım hər zaman mənimlədir”.

Xatırladaq ki, sözügedən ekran əsərində ədəbiyyat irsimizə qarşı hörmətsiz yanaşma müşahidə olunub, Azərbaycan klassik ədəbi-mədəni tarixində mühüm yer tutan Məhsəti Gəncəvi obrazının bədii təsvirində ciddi təhriflərə yol verilib. Görkəmli şairə filmində əxlaqi dəyərlərə zidd, gəzəyən və uyğunsuz davranışlar sərgiləyən qadın obrazında təqdim edilib.

Suad Qarayeva isə daha əvvəl Instagram hesabında paylaşım edərək onun tərəfindən ərsəyə gətirilən “Məhsəti” filminin Mədəniyyət Nazirliyinin Film Şurası tərəfindən lisenziya verilmədiyi üçün Bakı Film Festivalının proqramından çıxarıldığını bildirmişdi. Şuranın qərarına əsasən, filmin məzmunu mənəvi dəyərlərə uyğun hesab olunmayıb. Qarayeva özü də paylaşımında qeyd etmişdi ki, filmdə Məhsəti obrazını canlandıran aktrisa dostları ilə birlikdə kluba gedir, spirtli içki qəbul edir, rəqs edir və bir kişi ilə romantik münasibət yaşayır.

Qeyd edək ki, Suad Qarayeva sabiq mədəniyyət naziri Əbülfəs Qarayevin qızıdır.