Dünya çempionatlarında ən çox qol vuran komanda bəlli oldu

Almaniya millisi futbol üzrə dünya çempionatları tarixində ən çox qol vuran komanda olub. Almanlar bu göstəricidə Braziliya yığmasını geridə qoyaraq yeni rekorda imza atıblar.

AJMEDİA.NEWS xəbər verir ki, tarixi nailiyyət 2026-cı il dünya çempionatının qrup mərhələsinin ilk turunda Almaniyanın Kürasao yığması üzərində 7:1 hesablı qələbəsindən sonra rəsmiləşib.

Bu nəticədən sonra Almaniya millisinin dünya çempionatlarının final mərhələlərində vurduğu qolların sayı 239-a çatıb. Əvvəlki rekord 238 qolla Braziliya yığmasına məxsus idi. Braziliyalılar isə cari mundialın ilk turunda Mərakeşlə 1:1 hesablı heç-heçə etdiklərindən bu göstəricini artıra bilməyiblər.

İkinci tur çərçivəsində iyunun 20-də Braziliya Haiti ilə qarşılaşacaq. Almaniya millisi isə həmin gün Fil Dişi Sahili yığması ilə üz-üzə gələcək.

Qeyd edək ki, 2026-cı il dünya çempionatı ABŞ, Kanada və Meksikada keçirilir. Turnir tarixində ilk dəfə olaraq yarışda 48 milli komanda iştirak edir.

Almaniya yığması dünya futbolunun ən titullu komandalarından biri hesab olunur. Almanlar indiyədək dörd dəfə dünya çempionu olublar.