Bu məhsulları satanlar 5 minədək cərimələnəcək

Yeni il bayramı ərəfəsində ölkənin müxtəlif yerlərində pirotexniki vasitələrin satışına rast gəlinir. Halbuki qanunvericiliyə görə bu cür məmulatların satışı yalnız xüsusi icazə ilə həyata keçirilə bilər.

AJMEDİA.NEWS-un məlumatına görə, Azərbaycan Respublikası Prezidentinin “Mülki dövriyyəsi məhdudlaşdırılmış əşyaların dövriyyəsi haqqında” fərmanına əsasən, pirotexniki məhsullar mülki dövriyyəsi məhdudlaşdırılan vasitələr siyahısına daxildir. Bu səbəbdən həmin məmulatların satışı yalnız Fövqəladə Hallar Nazirliyinin verdiyi müvafiq icazə əsasında mümkündür.

Qanunsuz satış faktları aşkar edildiyi təqdirdə pirotexniki vasitələr dərhal dövriyyədən çıxarılır. Satışı həyata keçirən şəxslər barəsində İnzibati Xətalar Məcəlləsinin 442-ci maddəsinə uyğun olaraq protokol tərtib edilir və baxılması üçün məhkəməyə göndərilir. Qanunvericiliyə əsasən, inzibati xətanın predmeti olan pirotexniki məmulatlar müsadirə olunur. Bununla yanaşı, fiziki şəxslər 350–500 manat, vəzifəli şəxslər 1 600–2 500 manat, hüquqi şəxslər isə 4 000–5 000 manat məbləğində cərimə edilir.

Qeyd edək ki, bu məhdudiyyətlərin tətbiqində əsas məqsəd bayram günlərində vətəndaşların təhlükəsizliyini təmin etmək, mümkün bədbəxt hadisələrin və yanğınların qarşısını almaqdır.