Bakıdan qovulan özbək "həkim" jurnalistləri hədələdi: "Məhkəmədə görüşərik"

Bakıda “əl enerjisi” ilə xəstələri müalicə etdiyini deyən özbəkistanlı İqbol Soliyev Azərbaycandan deportasiya olunması ilə bağlı danışıb.

AJMEDİA.NEWS xəbər verir ki, o, sosial media hesabında paylaşdığı videoda hazırda Özbəkistanda olduğunu bildirib və Azərbaycanda olduğu müddətdə hər hansı problemlə üzləşmədiyini qeyd edib.

Soliyev həmçinin onun barəsində yazan özbək mətbuatını və bəzi bloqerləri məhkəməyə verməyə hazırlaşdığını deyib.

“Guya məni Azərbaycanda polis saxlayıb və həbs edib – bu iddiaları hansı əsasla səsləndirirsiniz? Mən Azərbaycanda seanslar keçirir, insanların içində olur, Allahdan şəfa diləyərək onlara kömək etməyə çalışırdım. Heç vaxt polis və ya rəsmi qurumlarla problemim olmayıb. Hansı təşkilat fəaliyyətimə mane olub? Əlinizdə sübut varsa, təqdim edin.

Yalan məlumatlar yayaraq haram qazanc əldə etməyə çalışırsınız. Ramazan ayında özünüzə gəlin, dua edin. Bir insanı qaralamaq asandır, amma mənim adımdan istifadə edib baxış toplamaq ayıbdır. Azərbaycanda fəaliyyətim şəffaf idi, canlı yayımlar açırdım. Hazırda isə Özbəkistanda, öz evimdəyəm. Əgər hər hansı qanun pozuntusuna yol versəydim, indi həbsdə olardım. İnsanların beynini zəhərləməyin, Allahdan qorxun. Artıq aidiyyəti qurumlara müraciət etmişəm və sizinlə məhkəmədə görüşəcəyik. Jurnalistikanın prinsiplərinə əməl edin, qərəzli yanaşmayın”, - deyə o bildirib.

Qeyd edək ki, Soliyev Bakıda olduğu müddətdə müxtəlif xəstəliklərdən əziyyət çəkən şəxsləri qəbul etdiyini və “əl enerjisi” ilə müalicə seansları keçirdiyini iddia edib. Onun fəaliyyəti sosial şəbəkələrdə geniş maraq doğurub və müzakirələrə səbəb olub. Aparılan araşdırmalar zamanı isə müəyyən edilib ki, İqbol Soliyevin tibbi xidmət göstərmək üçün tələb olunan müvafiq lisenziyası yoxdur. Azərbaycanda onun fəaliyyəti ilə bağlı hüquq-mühafizə orqanları tərəfindən qanunvericiliyə uyğun tədbirlər görülüb və nəticədə onun ölkədən çıxarılması təmin edilib.