Azərbaycanla İsrail arasında qarşılıqlı investisiyaların dəyəri açıqlandı

"2025-ci ildə Azərbaycan və İsrail arasında yüksəksəviyyəli qarşılıqlı əlaqələr ardıcıl şəkildə davam edib və iqtisadi tərəfdaşlığımızda müsbət dinamikanı möhkəmləndirib. Nazirlər səviyyəsində keçirilən bir sıra görüşlər və işgüzar təmaslar enerji sahəsində əməkdaşlığın inkişafına, yüksək texnologiyalar, kənd təsərrüfatı və ərzaqla bağlı həllər üzrə yeni imkanların araşdırılmasına, eləcə də investisiya layihələrinin dəstəklənməsinə yönəlib".

AJMEDİA.NEWS xəbər verir ki, bunu Bakıda keçirilən Azərbaycan-İsrail biznes forumunda iqtisadiyyat naziri Mikayıl Cabbarov bildirib.

O bildirib ki, Birgə Komissiya ikitərəfli təşəbbüslərin əlaqələndirilməsi və münasibətlərimizin genişləndirilməsi üçün əlavə impulsun yaradılması baxımından səmərəli mexanizm kimi fəaliyyət göstərir:

"Son olaraq, Birgə Komissiyanın 4-cü iclası 2025-ci ilin noyabrında Qüdsdə keçirilib və iclas zamanı enerji, ticarət, investisiya, kənd təsərrüfatı, nəqliyyat, rəqəmsallaşma, kibertəhlükəsizlik, turizm və qarşılıqlı maraq doğuran digər sahələrdə əməkdaşlıq prioritetləri nəzərdən keçirilib".

M.Cabbarov əlavə edib ki, əməkdaşlığımız investisiyaların təşviqi və qarşılıqlı qorunması, eləcə də ikiqat vergitutmanın qarşısının alınması haqqında sazişlərlə dəstəklənir ki, bu da biznes əlaqələrinin genişləndirilməsi üçün möhkəm hüquqi baza yaradır:

"Hazırda İsrail investisiyası ilə 130 kommersiya qurumu Azərbaycanda fəaliyyət göstərir. Qarşılıqlı investisiyaların dəyəri isə təxminən 600 milyon ABŞ dolları təşkil edir.

Ölkələrimiz genişspektrli sahələrdə konkret nəticələr verən güclü və praqmatik tərəfdaşlıq qurublar. Bunun bariz nümunəsi Azərbaycan İnvestisiya Şirkəti (Azərbaycan Biznesin İnkişafı Fondu) ilə İsrailin "OurCrowd" şirkəti arasında enerji, səhiyyə, kibertəhlükəsizlik, aqroərzaq və təhsil texnologiyalarına fokuslanmaqla texnologiya və biznes əlaqələrimizin genişləndirilməsinə yönəlmiş strateji əməkdaşlıq sazişinin imzalanması və icrasıdır".