Azərbaycanın Almaniyadakı Səfirliyi 27 Sentyabr – Anım Günü ilə bağlı Berlində tədbir təşkil etdi FOTOLAR

Berlin, Almaniya – Azərbaycanın Almaniyadakı Səfirliyi 27 Sentyabr – Anım Günü münasibətilə Berlində yerləşən Azərbaycan Mədəniyyət Mərkəzində tədbiri keçirib. Tədbir Vətən müharibəsi şəhidlərinin əziz xatirəsinə hörmət və onların göstərdikləri qəhrəmanlıqları yad etmək məqsədilə təşkil olunub.

Tədbirdə Azərbaycanın Almaniyadakı səfiri, diaspor təşkilatlarının rəhbərləri, Almaniyada yaşayan Azərbaycan, türk və digər dost icmaların üzvləri və media nümayəndələri iştirak ediblər.

Anım tədbiri Azərbaycanın ərazi bütövlüyünün və suverenliyinin bərpası uğrunda mübarizədə canlarından keçmiş qəhrəman şəhidlərimizin əziz xatirəsinin bir dəqiqəlik sükutla yad olunması ilə başlayıb.

Səfir Nəsimi Ağayev çıxışında 27 Sentyabrın Azərbaycan xalqı üçün tarixi və mənəvi əhəmiyyətini vurğulayıb, Vətən müharibəsində göstərilən qəhrəmanlıqların, dövlətimizin ərazi bütövlüyünün bərpası uğrunda edilən fədakarlıqların dünya ictimaiyyətinə çatdırılmasının önəmini qeyd edib. O həmçinin Almaniyada Azərbaycan həqiqətlərinin təbliği istiqamətində səfirliyin və diaspor təşkilatlarının birgə fəaliyyətini yüksək qiymətləndirib.

Qeyd olunub ki, məhz şəhidlərimizin qəhrəmanlığı sayəsində Azərbaycan uzun illər davam etmiş işğala son qoyaraq, tarixi ədaləti və beynəlxalq hüququ bərpa edib.

Səfir regionda sülhün bərqərar olması istiqamətində atılan addımlardan söz açaraq, avqustun 8-də Azərbaycan ilə Ermənistan arasında Vaşinqtonda sülh sazişinin paraflanmasının bölgə üçün tarixi əhəmiyyət daşıdığını qeyd edib. Bu sənədin 40 ilə yaxın müddətdə davam etmiş münaqişəyə son qoyaraq Cənubi Qafqazda sabitlik və əməkdaşlıq üçün yeni imkanlar açdığı diqqətə çatdırılıb. Xüsusi vurğulanıb ki, Azərbaycanın irəli sürdüyü sülh təşəbbüsləri təkcə iki ölkənin deyil, bütövlükdə regionun firəvan gələcəyinə xidmət edir.

Anım mərasimində çıxış edən tanınmış jurnalist Evald Köniq Avropanın çoxlu sayda münaqişələrlə əhatə olunduğu bir dövrdə Azərbaycan ilə Ermənistan arasında Vaşinqtonda əldə edilmiş sülh anlaşmasının region üçün ümid yaratdığını bildirib. Avropanın sabitliyə ehtiyacı olduğunu vurğulayan E.Köniq bunun üçün real imkan yarandığını və bu prosesdə Azərbaycanın mühüm rol oynadığını qeyd edib. O bildirib ki, Avropa ilə Asiya arasında strateji mövqedə yerləşən Azərbaycanın sülhə nail olması Avropanın enerji təhlükəsizliyi baxımından da önəmli rol oynayır.

Çıxışlardan sonra Bakı Media Mərkəzi tərəfindən çəkilən və Vətən müharibəsində Azərbaycan Ordusunun qəhrəmanlığına və şəhidlərimizin əziz xatirəsinə həsr olunan "Şuşa, sən azadsan!" filmi nümayiş etdirilib.

Sonda iştirakçılar bir daha Azərbaycanın dövlət müstəqilliyi, suverenliyi və ərazi bütövlüyü uğrunda canından keçmiş qəhrəman şəhidlərin ruhuna dərin ehtiramlarını bildiriblər və daha sonra şəhidlərin ruhuna ehsan süfrəsi açılıb.