Axtarışa verilən Abbas Abbasovla bağlı YENİ FAKTLAR

Xəbər verdiyimiz kimi, Baş nazirin sabiq birinci müavini Abbas Abbasov Dövlət Təhlükəsizliyi Xidməti (DTX) tərəfindən istintaqa cəlb olunub və onun barəsində axtarış elan olunub. Bu gün KİV-də uzun müddətdən bəri Türkiyədə yaşayan Abbasovun cinayət məsuliyyətinə cəlb olunacağını əvvəlcədən bildiyi üçün Türkiyəni təcili tərk etdiyinə dair məlumat yayılıb.

AJMEDİA.NEWS bu mövzuda maraqlı məlumat əldə edib. Məlumata görə, Baş nazirin sabiq birinci müavini hələ hökumətdə təmsil olunduğu dövrdə hakimiyyəti ələ keçirməklə bağlı planlar qurub. O, məqsədinə Rusiyanın dəstəyilə çata biləcəyinə ümid etdiyi üçün 2000-ci ilin əvvəllərindən etibarən bu ölkənin siyasi dairələri ilə isti münasibətlər qurmağa başlayıb. Bu məsələdə ona Prezident Administrasiyasının ovaxtkı rəhbəri Ramiz Mehdiyev dəstək olub. Mehdiyev-Abbasov cütlüyü gələcək planlarını reallaşdırmaq üçün paralel olaraq Azərbaycan müxalifətinin bəlli qanadı ilə gizli əlaqəlar yaradıb. “Milli Şura” ideyası hələ 2005-2006-cı illərdən mövcud olub.

Məlumatlarda o da bildirilir ki, Abbasov və ailə üzvləri 1 milyard dollardan artıq vəsaitə nəzarət etmələrinə baxmayaraq, heç vaxt Azərbaycana investisiya qoymayıblar. Onlar biznes imperiyalarını Rusiya və Türkiyədə möhkəmləndiriblər. Siyasi ambissiyaları üzündən Azərbaycanda yaşaya bilməyəcəyini anlayan Abbas Abbasov hələ vəzifədə işlədiyi dövrdə Rusiya, Türkiyə və Avropa ölkələrində 10-a yaxın dəbdəbəli mənzil alıb.