Avropa tezliklə Rusiya aktivlərindən Ukrayna üçün istifadəyə dair qərar verəcək - Makron

Avropa İttifaqı ölkələri tezliklə Avropada dondurulmuş Rusiya aktivlərinin istifadəsi ilə bağlı qərar qəbul etmək niyyətindədirlər.

AJMEDİA.NEWS xəbər verir ki, bunu Fransa Prezidenti Emmanuel Makron Ukraynaya kömək etmək istəyənlər koalisiyasının iclasından sonra açıqlayıb: "Yaxın günlərdə işimizi başa çatdıracaq və aktivlər barədə qərar qəbul edəcəyik, bunu bütün Avropa ölkələri və əlbəttə ki, Avropa Birliyi və Avropa Komissiyası ilə əlaqələndirəcəyik".

Fransa prezidentinə görə, bu qərar "Ukraynaya aydın bir perspektiv verəcək və Rusiyaya təzyiq göstərəcək".

Aİ ölkələri dondurulmuş Rusiya aktivlərinin istifadəsi üçün hüquqi mexanizmlər hazırlamağa çalışırlar. Bu aktivlərin əksəriyyəti - 200 milyard avrodan bir qədər çox - Belçikadakı Euroclear platformasında bloklanıb.

Qeyd edək ki, ABŞ-ın hazırladığı sülh planının ilkin variantında Rusiyanın 300 milyard dəyərində ndondurulmuş aktivlərinin 100 milyardının Ukraynaya yardım üçün investisiya edilməsi məqsədilə ABŞ-a verilməsi, daha 200 milyardının isə ABŞ-Rusiya birgə investisiya fonduna köçürülməsi təklif edilirdi. Lakin Avropa İttifaqının tələbi ilə bu bənd plandan tam çıxarıldı.