ABŞ-yə məxsus hərbi təyyarə Moskvaya eniş edib

ABŞ Hərbi Hava Qüvvələrinə məxsus “Boeing C-17 Globemaster III” hərbi nəqliyyat təyyarəsi avqustun 25-də Moskvanın Vnukovo hava limanına eniş edib.
“Flightradar24”ün məlumatlarına görə, RCH4555 çağırış kodlu təyyarə Latviyanın paytaxtı Riqadan yola düşüb və Moskva vaxtı ilə təxminən saat 10:04-də Vnukovoya çatıb. “Flightradar24”də təyyarənin bort nömrəsi 07-7181 kimi göstərilir.

Məlumata görə, təyyarə avqustun 23-də Riqaya gəlib. Onun əvvəlki uçuşunun başlanğıc nöqtəsi ABŞ-nin Merilend ştatının Kemp-Sprinqs şəhəri göstərilib. Burada ABŞ prezidentinin hava nəqliyyatı ilə əlaqələndirilən Endryus Hərbi Hava Qüvvələri Bazası yerləşir.

Hazırda təyyarənin Moskvaya uçuşunun məqsədi barədə açıq mənbələrdə rəsmi məlumat yoxdur. Qeyd edək ki, “Boeing C-17 Globemaster III” ABŞ Hərbi Hava Qüvvələrinin ağır hərbi nəqliyyat təyyarəsidir və əsasən şəxsi heyətin, hərbi texnikanın və yüklərin uzaq məsafələrə daşınması üçün istifadə olunur.//yeniavaz.com