“8 aydır ki, vaxtımı alırlar, heç yerə gedə bilmirəm” – “Şərurlu İsfəndiyar” bəraət almasından danışdı

"Onsuz da burada cinayət işi yox idi, vaxtımı aldılar".

AJMEDİA.NEWS xəbər verir ki, bunu Musavat.com-a açıqlamasında "Şərur MTK”nın sahibi İsfəndiyar Axundov bu gün məhkəmədə bəraət alması ilə bağlı danışarkən deyib.

O bildirib ki, 8 aydır ki, məhkəmə davam edirdi: “8 ay mən həftədə iki dəfə məhkəməyə gedib gəldim. Əvvəldən bilirdim ki, bəraət alacağam, çünki günahım yox idi. Ancaq mənim üçün ən böyük cəza vaxtımın getməsi oldu. 8 aydır ki, məni işimdən aralı salıblar, işimlə məşğul ola və heç yerə gedə bilmirdim. Bunun özü cəzadır da. Mən əvvəldən Emil Səməndərova dedim ki, məni məhkəməyə verməklə nə etmək istəyirsən? Heç özləri də bilmirdi. Mənim üzərimdən özlərini reklam edirdilər ki, bax, İsfəndiyarı məhkəməyə gətirdirik. Mən heç ona dələduz deməmişdim. Bu, bir oyun idi və özləri uydurmuşdu”.

Qeyd edək ki, "Şərur MTK”nın sahibi İsfəndiyar Axundovun (Şərurlu İsfəndiyar) barəsində xüsusi ittiham qaydasında verilən şikayət üzrə məhkəmə prosesi yekunlaşıb. Bu gün Binəqədi Rayon Məhkəməsində hakim Vüsal Tağıyevin sədrliyi ilə keçirilən prosesdə qərar elan olunub. Məhkəmə işdə cinayət tərkibi olmadığını əsas gətirərək, İsfəndiyar Axundova bəraət verilməsi barədə qərar çıxarıb.

Xatırladaq ki, İsfəndiyar Axundov barəsində Cinayət Məcəlləsinin 147.2-ci (böhtan) və 148-ci (təhqir) maddələri üzrə xüsusi ittiham qaydasında şikayət edilib. Xüsusi ittiham qaydasında "Proqress 2016” MTK-nın rəhbəri Emil Səməndərov şikayət edib. İttihama görə, İsfəndiyar Axundov müsahibəsində Emil Səməndərovu dələduz kimi təqdim edib.